Sancti Leonis Magni Tractatus

Tractatus XIII

Quod temporis ratio et deuotionis nostrae admonet consuetudo, pastorali uobis, dilectissimi, sollicitudine praedicamus decimi mensis celebrandum esse ieiunium, quo pro consummata perceptione omnium fructuum dignissime largitori eorum deo continentiae libamen offertur.

Quid enim potest efficacius esse ieiunio, cuius obseruantia appropinquamus deo et resistentes diabolo uitia blanda superamus?

Semper enim uirtuti cibus ieiunium fuit.

De abstinentia denique prodeunt castae cogitationes, rationabiles uoluntates, salubriora consilia.

Et per uoluntarias afflictiones caro concupiscentiis moritur, uirtutibus spiritus innouatur.

Tractatus XIII - pars 2

Sed quia non solo ieiunio animarum nostrarum salus adquiritur, ieiunium nostrum misericordiis pauperum suppleamus.

Inpendamus uirtuti, quod subtrahimus uoluptati.

Fiat refectio pauperis abstinentia ieiunantis.

Studeamus uiduarum defensioni, pupillorum utilitati, lugentium consolationi, dissidentium paci.

Suscipiatur peregrinus, adiuuetur oppressus, uestiatur nudus, foueatur aegrotus, ut quicumque nostrum de iustis laboribus auctori bonorum omnium deo sacrificium huius pietatis obtulerit, ab eodem regni caelestis praemium recipere mereatur.

Tractatus XIII - pars 3

Quarta igitur et sexta feria ieiunemus, sabbato autem apud beatum Petrum apostolum pariter uigilemus, cuius suffragantibus meritis, quae poscimus, impetrare possimus, per christum dominum nostrum.

Return to index